إسكندرية و سحرها لما تكون في عز النوة و انت و لا على بالك و ماشي تحت المطر تتنطط ... إسكندرية لما تحس و انت داخل على بابها ان صدرك بتفتح و بتدب فيه الحياة من تاني و كأنك مكنتش عايش ... إسكندرية لما تفرد همومك عالبحر و المية تضوي في عيونك زي ما تكون بتطبطب عليك و بتحضنك ... و لما تكلم الموج في سرك و تناديه و يجري عليك يغرقك بموجة عالية تكسر جمود الصخر و قساوته ... إسكندرية اللي كل ما تفتكرها تحس بدفا الشمس على جلدك و طعم الملح على شفايفك و ريحة اليود و نسمة هوا معدية على جلدك تبوسه في عز الحر و تخلى جسمك يقشعر اسكندرية ما تتوصفش دي تتعاش و تتحس بس
1 comment:
ايه الحلاوة دى يا بنت يا اسكندرنيه يا احلى بنات بلدى بجد احساس جامدددددددددددددددددددددددد قوى كانى جنبك على الكورنيش بنتطنطط سوا والموج بيخبط فى الصخر ويجى علينا والشتا نازل على شعرنا وبنمسحة بادينا
فعلا رائعة يا بنت جهتى
Post a Comment